Iboto Nyo’ Ko!
Illustration by: Greg Diaz
Mga kababayan ko, karapat-dapat akong iboto. Nakapaskil sa lahat ng pader ang mukha ko para patunayang karapat-dapat ako. Marami ng nagtanong sa akin kung bakit ako dapat iboto. Ang sagot ko, marami akong pwedeng idahilan kung bakit.
At bakit?
Dahil:
1. Wala naman sa itsura ko ang maging magnanakaw at manloloko. Pogi ako, pwedeng pwedeng gawing representatib ng ating bansa, hindi ako mahihiyang humarap sa tao. May showbiz quality.
2. Ako naman ay nakapag-aral at nakapagtapos sa isang prestihiyosong kolehiyo. Napag-aralan ko ang English, Math at Social Studies na napakahalaga para sa posisyong ito. English para magandang pakinggan pag ako’y nagsalita. Math para magaling akong magbilang ng pera. At Social Studies para naman matuto akong makipagsosyalan at makipaghalubilo sa mga importanteng tao.
3. Tinuruan din akong makisalamuha sa mga mahihirap. Galing man ako sa isang mayamang angkan ay advantage pa rin yun para sa akin.
4. Marami akong maipapangako katulad ng: ipapaayos ko ang mga paaralan, opisina, ospital, kulungan, basketball gyms, parke, mall, simbahan, beach resorts, airports, casino, sinehan, motel, at iba pa. Ang kailangan lang natin ay malaking pondo galing sa mga bulsa ninyo at tiyak ay solb na solb ang lahat ng ito!
5. Ipapakita ko sa inyo na ako’y nagdadasal at nagsisimba. Pasasalamat sa lahat ng kayamanan at perang natatanggap ko sa tulong ninyo.
6. Gagawa ako ng kung ano anong proyekto para tumaas ang pork barrel ko. Magpapatupad tayo ng kung ano anong batas para humaba ang listahan ng accomplishments ko. Isa rito ay ang pagparami ng holidays sa ating bansa.
7. Dahil totoo sa aking puso ang pagtulong at pagsilbi sa inyo, lahat ng proyekto ko ay may pangalan ko para naman maalala ninyo laging marami akong nagawa.
8. Makikilala ang ating bansa. Magpaparami tayo ng mga katulad ni Pacquiao. Mageendorso ako ng makilala ng husto.
9. Dahil natural na tataas ang presyo ng gasolina, pamasahe, kuryente, tubig, renta sa bahay, gulay, karne, isda, gamot, matrikula, bayad sa toll at tax, ibababa ko ang bayad sa sinehan para kayo ay masiyahan.
10. Bibili ako ng maraming lupa, bahay, kotse, eroplano, gusali, alahas, at lahat ng ari-ariang maisipan ko para makita ng lahat kung gaano tayo kayaman! Bibili rin ako ng mga ari-arian sa ibang bansa, patunay na kaya nating pumantay sa kanila.
11. Magdodonate ako sa mahirap gamit ang sarili kong pera. Mamimigay ako ng pera sa mga botante, libreng gamot sa mga may sakit, pampapyesta sa kada barangay, dadalo sa lahat ng ribbon-cutting sa kahit saan mang sulok ng Pilipinas, yayakap, makikipagkamay, bebeso, at ngingiti sa lahat ng tao kapalit ang simpleng pagsulat ninyo sa pangalan ko sa inyong mga balota.
12. Babayaran ko ang utang ng ating bansa at dadagdagan ang mga isla nito para naman ay hindi congested ang Maynila.
13. Gagawin nating ligal ang mga pasugalan, at iba pang iligal para makadagdag rin sa oportunidad para kumita ang mga tao. Tataas ang ating ekonomiya kapag tayo’y malayang makapag export ng mga iligal na bagay katulad ng droga, armas, mga endangered species at siyempre ang mga sariling atin na kababayan!
14. Magpaparami ako ng body guards at magpapaexempt sa gun-ban para makasiguro sa aking security. Paminsan-minsan ay magbabakasyon rin ako sa magagarang lugar at kakain ng napakamahal na mga pagkain para makapagrelax at makapag-unwind. Mga kababayan, kung ako’y napagod ng todo-todo at nagkasakit, paano nalang kayo? Kapakanan niyo pa rin ang iniisip ko!
15. Benepisyo para sa mga senior citizens na libre ang entrance sa Star City kapag kaarawan nila. At pati na rin sa mga estudyanteng walang bagsak sa skwela. Incentive, ika nga.
Ilan lang yan sa mga dahilan kung bakit nararapat akong iboto ninyo. Gagawa pa ako ng maraming pangako na ikatutuwa ninyong lahat.
Pag-isipan ninyong mabuti! Gallardo para sa Senado at tiyak ay may kinabukasan AKO at ang lahat! AKO bago ang lahat!
